القصة تبدأ أحداثها فى قسم ٨ غرب اللى د/يحيى (كريم عبد العزيز) كان شغال فيه من الجزء الاول .. مريضة psychotic هى فريدة (هند صبرى) طلبت متتكلمش غير مع يحيى و من هنا تم استدعائه و ابتدت الاحداث تانى لما اكتشف ان نائل (الشيطان اللى كان طرده من خالد الصاوى فى الجزء الاول) رجع تانى.
بتدور الاحداث فى انه بيدور على طريقة يتخلص منه نهائيا المرادى بمساعدة حبوب الفيل الازرق اللى بتخليه يكسر حاجز الزمن و المكان عشان يكتشف نقطة ضعف نائل.
تقييمنا ان الفيلم طالع بصورة ممتازة و نقدر نقول انه بيعدى كذا فيلم اجنبى من نفس النوع .. تصوير هايل و نقطة قوته فى المؤثرات الصوتية اللى مخليه للفيلم كل الانبهار اللى حسيناه.
القصة ابسط من الجزء الاول من غير تعقيدات كتيرة و تحسها سلسة مفيش فيها مشاكل و مش متكلفة
كريم عبد العزيز كل فيلم بيثبتلنا انه من احسن ٣ ممثلين حاليا فى مصر و مفيش دور بيعجز عن ادائه
هند صبرى طلعت يمكن باكبر دور ليها تعمله .. تقمصها لشخصية البنت اللى شيطان متلبسها و بتحاول تهرب منه فى اوقات مفيهوش غلطة و محسيناش انه فيه افورة مثلا زى ما بنشوف ساعات فى حالات التلبس دى فى بعض الافلام.
شاهد ماذا يحدث لجسدك عندما تتناول حبوب الفيل الأزرق
نيللى كريم و اياد نصار عاملين ادوارهم صح بس للاسف هى ادوارهم مش محتاجة ابداع لكن مع ذلك موصلين شخصياتهم بالصورة اللى المتوقع توصل.
ده اول فيلم مصرى يحسسك انه رعب فعلا عموما و تجربة مينفعش تتفوت بس عشان تستمتع بيه اهم حاجة تدخله فى سينما نضيفة و نرشح سينمات plaza فى اكتوبر و سينمات point 90 التجمع و اكيد سينمات vox فى مول مصر باكتوبر.
مدة عرض الفيلم: ساعتان و ١٠ دقائق
نوع الفيلم: اثارة ، رعب
الاسعار بتتراوح بين ٥٥ ل ١٠٠ على حسب الحفلة و المكان و الفيلم عادى 2D
التقييم النهائى: ٨.٥/١٠
#الفيل_الازرق٢
تقيم Dr review
