العالم كُلّه مقلوب على كارثة مُستمرّة بقالها فترة .. وإحنا ولا عندنا فِكرة
غابات الأمازون المطيرة مُشتعلة بالنيران من يوم ١٣ أُغسطس اللّي فات ، يعني بقالها 10 أيام مُتّصلين النيران ماسكة فيها وبتاكل في ما يُعد ٢٠٪ من مصادر الأُكسُچين اللّي في الكوكب، مأوى لما لا يقل عن ٣ مليون نوع نباتات وحيوانات مُختلفين، بالإضافة لحوالي مليون فرد من السُكّان الأصليين..!
غابات الأمازون العجوز اللّي بقالها ٥٥ مليون سنة موجودة، تُعتبر أكتر من نُص مساحة الغابات المطيرة فالعالم فبتمتد في مساحة تُقدّر بحوالي ٥.٥ مليون كيلومتر مُربّع عبر أكتر من بلد، وإن كان النصيب الأكبر للبرازيل بحوالي ٦٠٪من مساحتها، تليها بيرو بنسبة ١٣٪، كولومبيا ١٠٪ والباقي متوزّع ما بين ڤينيزويلا، إكوادور وبوليڤيا وچويانا وسورينام .
طبعًا مساحة مهولة مليانة أشكال تكاد لا تُعد ولا تُحصى من تنوّعها، تخيّل بس الأشجار اللّي فيها واللّي تقريبًا وصلوا لـ ٣٩٠ مليار شجرة في ١٦ ألف صنف مُختلف، مُتخيّل أنواع الحياة المُختلفة جوّاها ..؟
الحرائق في منطقة الأمازون مُعتادة ومُتكرّرة على مدار السنة كل سنة، بس السنة دي الوضع أسوأ بمراحل، فلحد دلوقتي الحرائق زايدة بنسبة ٨٣٪ عن السنة اللّي فاتت بمقدار حوالي ٧٢ ألف حريق من أول السنة، وده يعتبر كارثة بكُل المقاييس ..!
.
الحريق الحالي واللّي سبّبه الجفاف الشديد مع ارتفاع الحرارة مع تدخُّل العامل البشري من حرق أطراف الغابة لخلق مساحات رعي مع برق هنا أو هناك في بعض الأحيان، مُستمر بقالُه حوالي أسبوعين أهو، وبصفة مُستمرّة لدرجة إن البرازيل أعلنت حالة الطوارئ في البلاد يوم الاثنين اللّي فات، والإحصائيات الأوليّة بتقول إن حوالي ٢.٥ مليون كيلومتر مُربّع من الأشجار تأثرت بالحرائق باختلاف درجات اشتعالها ، يعني تقريبًا نُص مساحة الغابة ، سُحُب دُخّان الحرايق دي غطّت مساحة تُقدّر بحوالي ٣ مليون وشوية كيلومتر مُربّع .. مُتخيّل ..؟ الحرائق مغطيّة نُص مساحة البرازيل ومتشافة من الفضاء من قِبل ناسا ومحطة الفضاء الدولية .
جُزء كبير من اللّي بيحصل بيقُع على عاتق رئيس البرازيلي بولسونارو وحكومته اللّي نفى تمامًا كُل التقارير الصادرة من الجهات المُختصّة بمُتابعة الغابات ونشاطها ، ومُتجاهل إنُّه وحكومته مُهملين تمامًا في الحفاظ عليها لأ وبيساعدوا في موضوع التصحّر وحرق الغابات في سبيل الصناعات والتعدين والتنقيب عن البترول ومُعتبر المُصيبة دي مش من أولويات حكومته على أساس إن – زيّ ما قُلنا – حرائق الغابات دا شئ مُعتاد ومتكرّر كل سنة .. وعلى لسانه بيقولك “النّاس بقت تقول عليا نيرون، جايّ عشان أحرق الأمازون” .. والحملات الغاضبة بتقوم ضدّه سواء من النّاس أو من القبائل الأصليين اللّي بيقاوموا بشراسة واستماتة .
وبالمُناسبة الصور اللّي شايفها تحت دي من مدينة ساو باولو البرازيلية، ودول مش متصوّرين باللّيل .. لأ .. دول صور متّاخدين الساعة ٤ العصر .. بعد ما سُحُب الدُخّان زحفت للمدينة وغطّتها تمامًا عشان تُحيل نهارها ليل .. باقي إنّك تعرف إن ساو باولو على بُعد حوالي ٢٧٠٠ كيلومتر من النيران ..!
.
وعايزك متنساش حرائق الـ ٢٠ ألف كيلومتر بتوع سيبيريا اللّي حكيتلك عنها من أسبوعين، ولحد دلوقتي الحرائق مُستمرّة بدون نتائج إيجابية لمُحاولات إخمادها .
ودا كُلّه كوم، وموضوع التصحّر كوم تاني، فشهر يوليو اللّي فات سجّل أكبر مُعدّل تصحُّر شافته الغابات من بداية التسجيل، فتلاقي إن حوالي مساحة ١٣٤٥ كيلومتر مُربع من الغابة اختفى تمامًا، سواء لأسباب طبيعية أو لناس بتقطّع فالأشجار لأغراض صناعية فينا يُسمى بالتجريف ، يعني تصحُر وتجريف من ناحية وحرائق من ناحية أُخرى .. عندك فكرة دا معناه إيه ..؟
يعني ارتفاع نسبة أول أول أُكسيد الكربون واللّي بالتّالي هيعمل الكوكب كُلّه أكنُّه صوبة زجاجية عملاقة ويحبس الحرارة اللّي إحنا بالفعل بنولّدها مع الحرارة والأشعة اللّي جاية من الشمس فحرارة الكوكب كُلّه هتزيد ودا هيسيّح ثلوج القُطبين بمُعدّل أعلى ممّا هي بتسيح عليه بالفعل وبالتّالي ارتفاع نسبة المُحيطات والبحار ففيضانات فتسوناميز فغرق مُدن ساحلية – منُهم إسكندرية على سبيل المثال لا الحصر – فهُوب هنبقى حضارة مائية ولازم يطلعلنا خياشيم عشان نقدر نتأقلم في العالم الجديد.
العالم من حولنا بيحترق وإحنا ببُطء بنزحف نحو نهايته ..
محمد عبد المحسن
